Átta ára myndlistarkona heldur sína fyrstu einkasýningu

Þessa dagana standa yfir Fjölskyldudagar í Vogum þar sem fjölmargir áhugaverðir viðburðir eru á dagskrá. Ein myndlistarsýning vakti sérstakan áhuga Víkurfrétta en átta ára myndlistarkona, Eldþóra Gísladóttir, opnaði sína fyrstu einkasýningu í gær.

Eldþóra segist hafa málað frá því hún man eftir sér og sækir innblástur í sitt nánasta nágrenni. „Ég hef málað frá því að ég var lítil og lífið mitt hefur orðið betra og betra. Núna er dagurinn þar sem fyrsta myndlistarsýningin mín, í öllu lífinu mínu, er haldin og mér líður rosalega vel og er næstum því búin að fá engan svefn,“ sagði myndlistarkonan við tilefnið en hún segist hafa lagt hart að sér og málað alla daga upp í aðdraganda sýningarinnar.

Sýninguna prýða fjölmörg listaverk eftir Eldþóru og er lokadagur hennar næstkomandi sunnudag. Sýning Eldþóru er hún opin í dag, föstudag, og á morgun á milli klukkan 14 og 18 og frá 14 til 16 á sunnudaginn.

Þess má geta að málverkin hennar Eldþóru eru til sölu en það var mikið að gera hjá listakonunni ungu í opnuninni því þau ruku flest ef ekki öll út. „Ég á fimm önnur málverk tilbúin ef allar myndirnar seljast,“ sagði Eldþóra og á hún örugglega eftir að þurfa að mála fleiri til að anna eftirspurn.

Viðtal við listakonuna mun birtast í næsta tölublaði Víkurfrétta en Eldþóru er ýmislegt til lista lagt. Hún hefur m.a. leikið í tónlistarmyndbandi hljómsveitarinnar Storð við lagið Blue on blue og má sjá það í spilaranum hér að neðan.

Fjölskyldurdagar 2023: Myndlistarsýning Eldþóru Gísladóttur