Atli Már og Lalli Johns; menn með framtíðarsýn!

Atli Már Gylfason er ungur framkvæmdarmaður úr Keflavík sem eflaust á eftir að láta mikið til sín taka í framtíðinni. Undanfarna daga hefur hann verið mikið í sviðsljósinu í Reykjanesbæ, þá sér í lagi í félagslífinu. Hann er einn af aðalleikurum leikritsins Grettis sem leikfélag Keflavíkur hefur verið að sýna í frumleikhúsinu og nú hefur hann boðið sig fram í formennsku Nemendafélags Fjölbrautaskóla Suðurnesja. Kosningar í hin ýmsu ráð skólans hófust í gær og halda áfram í dag. Það hefur því verið nóg að gera hjá þessum unga „orkubolta“ undanfarið. Atli Már sagði í viðtali við blaðið að hann hefði gaman af því að vera allt í öllu og hafa nóg fyrir stafni, eða eins og einn vinur hans orðaði það; „Hann hefur alltaf eitthvað að gera þó svo það sé ekkert að gera“
En af hverju ertu að bjóða þig fram sem formann nemendafélagsins?
„Ég vil koma félagslífi skólans á skrið. Það hefur verið ágætis uppbygging á félagslífinu hjá sitjandi stjórn og munum við reyna að rífa það aðeins betur upp og byggja upp stemningu hjá nemendum. Kosningabarátta okkar sýnir það sem koma skal“.
Hverjir eru með þér í þessu verkefni?
„Við erum einn hópur sem kallar sig „forystuflokkurinn“ og þó svo það sé kosið um einstaklinga í þessum kosningum fannst okkur nauðsynlegt að setja saman hóp sem getur starfað saman á öllum sviðum félagslífsins. Í þessum hópi eru fyrir utan mig, Pétur Örn Helgason sem býður sig fram í formennsku skemmtinefndar, Runólfur Þór Sanders sem býður sig fram í varaformann og Sif Aradóttir í ritara“.
Kosningabarátta forystuflokksins hefur verið mjög skrautleg og hefur flokkurinn lagt mikið á sig til að kynna sín mál. Það er eflaust langt síðan að svona áhugaverð kynning hefur átt sér stað innan Fjölbrautaskólans og gaman að sjá hve mikið er lagt á sig til að ná til nemenda skólans. Forystuflokkurinn hefur t.d. látið útbúa boli þar sem meðlimir flokksins eru á skurðstofu og einnig þar sem þeir eru á slökkvistöðinni í góðum gír. Það sem hefur vakið hvað mesta athygli er hins vegar plaggöt af Atla Má ásamt hinum landsþekkta Lalla Johns þar sem þeir standa fyrir framan forsetabústaðinn á Bessastöðum.
Hvernig datt þér í hug að útbúa þessi plaggöt?
„Ég vildum einfaldlega sýna fólki fram á það að ég get fengið hvaða mann sem er til að taka þátt í uppbyggingu á félagslífi skólans. Ég fann þennan einstaka mann á gistiheimili í Reykjavík og fékk hann í smá sprell með mér. Við fórum í Hjálpræðisherinn og fengum kjólföt sem Lalli fékk svo að eiga og sagði hann við það tækifæri að nú kæmist hann loksins inn á Astró, sem er skemmtistaður í höfuðborginni. Þaðan lá svo leið okkar á Bessastaði þar sem myndirnar voru teknar af frábærum ljósmyndara, Jóa Dungal“.
Hvernig hefur annars kosningarbaráttan verið?
„Þetta hefur gengið framar vonum. Á sl. föstudag hópuðum við okkur saman og héldum framboðsræðu á sal skólans. Þar var nemendum skólans m.a. boðið í kosningarkaffi sem haldið var á mánudag. Þar buðum við uppá kaffi, gos, kleinur og snakk og svo spilaði Bubbi Morthens nokkur lög fyrir gestina. Það má segja að við höfum svo toppað þessa baráttu á þriðjudaginn þegar við mættum á slökkviliðsbíl í skólans í tilheyrandi búningum með pizzur frá Langbest og buðum fólki á sal skólans í mat“.
Hver hafa viðbrögðin verið?
„Þau hafa verið mjög góð. Fólk segir að stemningin sé frábær og biður okkur að halda áfram því sem við erum að gera“.
Hefur þetta ekki kostað ykkur miknn pening?
„Jú auðvitað hefur þetta kostað sitt og ef allt er tekið saman slær þetta í góð verkamannalaun. Við höfum hins vegar fengið mikla hjálp frá fjölda fyrirtækja og viljum við nota tækifærið og þakka þeim öllum fyrir aðstoðina“.
Að lokum, eru þið ekki örugg með sigur?
„Það er erfitt um slíkt að spá en ég treysti hins vegar nemendum til að velja rétt“.