Athvarfið Björg fagnar 1 árs afmæli

Björg, athvarf fyrir fólk með geðraskanir sem er starfrækt í Sjálfsbjargarhúsinu í Reykjanesbæ, hélt upp á eins árs afmæli sitt í dag. Fjöldi fastagesta og annarra áhugamanna um þetta málefni kom saman í Sjálfsbjargarhúsinu af þessu tilefni, en í boði voru tertur og annað bakkelsi í boði Sigurjónsbakarís.

Athvarfið Björg er samstarfsverkefni Fjölskyldu- og félagsþjónustu, svæðisskrifstofu málefna fatlaðra á Reykjanesi og Sjálfsbjargar á Suðurnesjum.
Markmið athvarfsins er meðal annars að rjúfa félagslega einangrun, efla sjálfstæði og auka samfélagsþátttöku fólks með geðræn vandamál. Skal það gert með uppbyggilegri félagslegri samveru, fræðslu, tómstundarverkefnum, persónulegum stuðningi o.fl.

Athvarfið er opið alla mánudaga til föstudaga frá klukkan 11 til 15. Boðið er upp á léttan hádegismat og að sjálfsögðu er alltaf kaffi á könnunni. Gestir athvarfsins borga 100 kr. á dag fyrir matinn.

Þeir sem vilja fá frekari upplýsingar um starfsemi athvarfsins geta annaðhvort sent fyrirspurn á [email protected] eða hringt í síma 421-1806 á milli 11 og 15. Einnig er öllum velkomið að koma og kynna sér starfsemi athvarfsins.

Margir aðilar, fyrirtæki og félagasamtök hafa lagt starfseminni lið og er öll líðveisla vel þegin.