Árlegir nýárstónleikar í Reykjanesbæ

Árlegir nýárstónleikar Tónlistarfélags Reykjanesbæjar verða haldnir í Kirkjulundi laugardaginn 15. janúar n.k. kl. 17:00.
Að þessu sinni mun Óperukór Hafnarfjarðar syngja á síðkjólum, bregða á leik og skapa sanna Vínarstemningu.
Stjórnandi kórsins er Elín Ósk Óskarsdóttir sópran. Elín mun einnig syngja einsöng ásamt Snorra Wium tenór og nokkrum öðrum stórgóðum söngvurum úr röðum kórfélaga. Undirleikari er Peter Máté og fiðluleikari Guðný Guðmundsdóttir.
Óperukórinn hefur sérhæft sig í óperu-, óperettu- og vínartónlist og mun kórinn flytja úrval gullmola á tónleikunum á laugardaginn.
Boðið verður upp á léttar veitingar í hléi. Miðaverð er kr. 2.500 og er ekki um styrktarfélagstónleika að ræða. Sala aðgöngumiða er hafin og fer fram í Listasafni Reykjanesbæjar í Duushúsum alla daga fram að tónleikum milli kl. 13 - 17:00. Einnig er hægt að panta miða í síma 421 3796.