Alveg geggjað sjónarspil

Sigurður Skarphéðinsson, varaslökkviliðsstjóri Brunavarna Suðurnesja, segir það hafa verið geggjað sjónarspil að sjá náttúruöflin í öllu sínu veldi í Geldingadölum. Víkurfréttir heyrðu í Sigurði og spurðu hann út í páskaundirbúning og fleira.

Hvernig á að halda upp á páskana? 

Líklegast verður farið í sumarbústaðinn hjá tengdaforeldrunum.

Eru hefðir hjá þér um páskana eða í páskamat?

Í sjálfu sér engar sérstakar hefðir en oftast þegar maður er ekki á vakt. Þetta er fyrsta sumarbústaðarferðin um páska og þá er það oftast einhver góð lambasteik á grillinu. 

Hvað hefðir þú gert þessa páska ef ekki væri þetta ástand í heiminum?

Líklega ekkert breytt á páskum en væri líklega búin að kíkja til Tenerife á vetrarmánuðum ef ekki væri fyrir þetta ástand.

Hvernig er uppáhaldspáskaeggið þitt?  

Núna í ár verður það saltkaramellupáskaegg.

Hver er þinn uppáhaldsmálsháttur?

Svo lærir lengi sem lifir.

Hvað viltu segja nú þegar nýjustu takmarkanir voru settar vegna Covid-19? 

Vil helst ekki hafa það eftir, vona bara að þetta vari stutt og fólk fari mjög varlega og haldi sóttvarnareglur í heiðri og spritti, passi fjarlægðir á milli fólks og hugi vel að hvort öðru, þessu hlítur að fara að ljúka ... vonandi.

Ertu búinn að fara á gosstöðvar og hvernig var upplifunin? 

Búin að fara með konunni og vinahjónum. Fengum æðislegt veður, stillt en frekar kalt og fórum seinnipart þannig að við náðum að koma á staðinn í birtu og vorum fram í myrkur. Alveg geggjað sjónarspil, náttúruöflin í öllu sínu veldi og vel þess virði. Gönguferðin er samt erfiðari en margir halda og mæli ég með að allir séu vel búnir og í góðum gönguskóm auk þess að vera með ljós ef verið er fram í myrkur, alveg nauðsynlegt.