Alþjóðadagur læsis / Gaman saman hópurinn

Síðastliðinn föstudag  þann 7. september komu þær vinkonur okkar frá Nesvöllum þær nöfnurnar Guðrún Emilsdóttir, Guðrún Finnsdóttir og Guðrún Greipsdóttir í heimsókn í leikskólann Gimli í tilefni af alþjóðadegi læsis sem í ár bar upp á laugardaginn 8. september.

Þær nöfnur lásu sögur, fóru með þulur og kvæði við mikla hrifningu barna og kennara.
Þess má geta að þetta er fyrsta samverustund yngri borgara á Gimli og eldri borgara á Nesvöllum á þessari haustönn, í verkefninu  Gaman saman sem staðið hefur yfir í rúm sex ár. Verkefnið hefur nú þegar fest sig í sessi sem samfélagslegt verkefni þar sem kynslóðir miðla á milli sögum, ljóðum, söng, dansi og síðast en ekki síst ljúfri nærveru, virðingu og umhyggju. 

 Þessar stundir eru alltaf jafn dýrmætar og við í leikskólanum Gimli svo lánsöm að eiga þessar yndislegu vinkonur og vini á Nesvöllum sem alltaf eru tilbúin til að taka þátt í starfinu með okkur.
Verkefnið Gaman saman hressir, bætir og kætir unga sem aldna.

Með bestu kveðju,
Karen Valdimarsdóttir leikskólastjóri á Gimli