Allt lagt í sölurnar fyrir hlutverk í mynd Clint Eastwoods

Þeir biðu nokkrir eftir að húsið opnaði, ólmir í að fá hlutverk í mynd Clint Eastwoods, Flags of our Fathers. Stöðugur straumur manna mætti á svæðið, þar sem umboðsfyrirtækið Eskimo var með áheyrnarprufur. Flestir með það fyrir brjósti að taka þátt í myndinni með átrúnaðargoðinu sínu.

Þeir voru mældir í bak og fyrir, ekki seinna vænna að vita málin á þeim þar sem unnið er að búningagerð fyrir skarann. Nauðsynlegt var að vita allt frá ummáli höfuðs til hvaða stærð þeir þurftu af hönskum.

Verið var að leita að aukaleikurum, allir í hlutverki hermanna og verður misjafnt hversu stór hlutverk þeir fá. Sumir þurfa að leika lík meðan aðrir fá stærri hlutverk.  Þó verður leitað til atvinnuleikara að mestu með þau töluðu hlutverk sem eru í myndinni, enda mikilvægt að hafa hreiminn réttan.

Þá hafa nú þegar verið haldnar prufur hjá Varnarliðsmönnum þar sem um 60-70 hermenn voru valdir. Að sögn Eskimo var mikilvægt að finna til menn sem kunna réttu handbrögðin þegar kemur að landtöku í myndinni.

Það er ýmislegt sem aukaleikararnir þurfa að leggja á sig við gerð myndarinnar. Þeir sem fá hlutverk í myndinni verða að mæta á alla þá daga sem þeir eru bókaðir. Annars er hætta á að tökur eyðileggist. Þá má viðkomandi ekki breyta neinu í fari sínu fram að tökum, ekki fara í klippingu, litun eða sólböð.

Langflestir sem taka þátt í myndinni að vera sáttir við að hár þeirra mun fjúka af og flestir þurfa að vera krúnurakaðir. Nokkrir hárprúðir drengir voru mættir á svæðið og voru þeir ekki á eitt sáttir við að þurfa að láta lokkana fjúka. En eftir sá umhugsun sögðu þeir í kór: „Allt fyrir Clint!“