Aðventutónleikar Kvennakórsins og Víkinganna í kvöld

Kvennakór Suðurnesja og Söngsveitin Víkingar halda sameiginlega aðventutónleika í Hljómahöllinni í Stapa í kvöld, miðvikudaginn 1. desember kl. 20. Á dagskránni verða jólalög úr ýmsum áttum auk kirkjulegra verka og munu kórarnir syngja í sitt hvoru lagi en enda síðan tónleikana með því að syngja nokkur lög saman.

Í haust tók hinn kunni söngvari Jóhann Smári Sævarsson við sem stjórnandi Víkinganna en Dagný Þórunn Jónsdóttir sópransöngkona er stjórnandi Kvennakórs Suðurnesja eins og undanfarin ár. Um hljóðfæraleik sjá Geirþrúður Fanney Bogadóttir á píanó, Birna Rúnarsdóttir á þverflautu og Einar Gunnarsson á harmonikku. Þetta verður söngveisla sem kemur öllum í jólaskap í byrjun aðventu. Miðasala verður við innganginn og er miðaverð kr. 2000.

Kvennakórskonur hafa verið önnum kafnar undanfarið, en auk þess að æfa stíft fyrir tónleikana skelltu þær sér eina helgi í byrjun nóvember á Sólheima í Grímsnesi þar sem þær saumuðu álfabúninga sem notaðir verða á þrettándagleði Reykjanesbæjar, en kórinn tekur þátt í þeirri hátíð á hverju ári. Um þarsíðustu helgi hittust kórkonur síðan ásamt fjölskyldum sínum og skáru út og steiktu 1500 laufabrauð, en laufabrauðssalan er orðinn fastur liður í fjáröflun kórsins og er laufabrauðið frá kvennakórnum mjög vinsælt. Þeir sem hafa áhuga á að kaupa laufabrauð geta sent pöntun á netfangið [email protected] eða haft samband við kórkonur.
Eftir áramót fer kórinn síðan að undirbúa sig fyrir landsmót kvennakóra sem haldið verður á Selfossi 29. apríl – 1. maí 2011 auk þess sem kórinn mun að venju halda vortónleika næsta vor. Liður í þeim undirbúningi eru æfingabúðir í Skálholti en þangað fer kórinn í byrjun febrúar.