200 ungmenni á strengjamóti í Reykjanesbæ

Strengjamót þar sem þátt taka nær 200 ungmenni og kennarar hefur staðið yfir alla helgina í Reykjanesbæ í umsjá Tónlistarskóla Reykjanesbæjar. Æfingar hafa verið í húsakynnum Fjölbrautaskóla Suðurnesja, Holtaskóla og Íþróttahúsi Keflavíkur. Hefur hópurinn gist á sömu stöðum.Að sögn Haraldar Á. Haraldssonar, skólastjóra Tónlistarskóla Reykjanesbæjar hefur allt gengið mjög vel og þátttakendur á mótinu verið mjög ánægðir með aðbúnað og dagskránna.
Auk tónlistaræfinga hafa krakkarnir farið í sund og í gærkvöldi var til að mynda diskótek og kvöldskemmtun. Þá voru tónleikar með hinni kunnu Sigrúnu Eðvaldsdóttur í Ytri-Njarðvíkurkirkju. Sérstakar strætóferðir voru fyrir þátttakendur á mótinu til að koma auðveldlega á milli staða.
Mótinu lýkur í dag með tónleikum í íþróttahúsinu kl. 14 þar sem allir eru velkomnir. Tónlist frá nemendum tíu tónlistarskóla víðs vegar af landinu mun óma um húsið þar sem körfubolti er yfirleitt fyrirferðarmeiri.