Villigæsirnar Íslandsmeistarar

Villigæsirnar eru þær nefndar í 8. flokki stúlkna í körfu hjá Keflavík en þær urðu Íslandsmeistarar eftir sigur á Grindavík 38-16 í Frostaskjóli KR-inga sl. helgi.
Í úrslitakeppninni kepptu einnig KR, Kormákur og UMFN. Keflavíkurstúlkur tóku þær grindvísku með óvæntu herbragði í úrslitaleiknum með því að „pressa“ þær í byrjun og komust þannig í 20:2. Þann mun náði Grindavík aldrei að brúa. Þessar sömu Keflavíkurstúlkur urðu Íslandsmeistarar fyrir tveimur árum þannig að efniviðurinn er mikill og baráttuandinn til staðar. Gæs er lykilorð þeirra í baráttunni (Get-Ætla-Skal) og vegna mikils baráttuanda bættu þær við orðið og kalla sig Villi-gæsir. Á myndinni eru stúlkurnar sigurglaðar með þjálfara sínum Kristínu Blöndal.