Víðismenn á góðri siglingu

Víðir Garði hafði góðan 2-0 sigur á KV í 3. deild karla í knattspyrnu í kvöld en töluvert rok var á Garðsvelli og áttu leikmenn beggja liða í miklu basli við það eitt að hafa stjórn á boltanum. Þeir Slavisa Matic og Haraldur Axel Einarsson gerðu mörk Víðismanna í kvöld og sitja Garðbúar því enn á toppi B-riðils í 3. deild.

 

Leikurinn var nokkuð gróflega leikinn og svo virtist sem KV reyndu eftir fremsta megni að berja á Víðismönnum í stað þess að sækja með markvisst með rokinu. Víðismenn gerðu fyrsta markið skömmu fyrir hálfleik og það síðara kom í seinni hálfleik og 2-0 lokatölur leiksins.

 

Víðir hefur fullt hús stiga eftir þrjá leiki og hefur liðið gert 13 mörk í leikjunum en aðeins fengið á sig eitt mark. Næsti leikur liðsins er gegn BÍ/Bolungarvík laugardaginn 16. júní.

 

VF-myndir/ [email protected] – Frá leik Víðis og KV. Á efri myndinni fagna Víðismenn fyrsta marki leiksins og á þeirri neðri er Slavisa að senda knöttinn í netið.