VF - SPORTMOLAR
netfang: [email protected] Þrjár af Suðurnesjum í U-20 Undir 20 ára landslið kvenna í körfuknattleik flaug til Kaupmannahafnar í gær til keppni í Norðurlandamótinu Polar cup. Þrjár stúlkur af Suðurnesjum eru í liðinu, ein frá hverju félagi. Marín Karlsdóttir f.h. Keflvíkinga, Eva Stefánsdóttir Njarðvíkingur og Sólveig Gunnlaugsdóttir úr Grindavík en ÍR-ingar eru atkvæðamestir, eiga sex leikmenn í hópnum. Grindavíkurmeyjar lágu Grindavíkurmeyjar lágu 0-6 gegn meistaraliði KR í Grindavík en eru þrátt fyrir markatöluna 2-27 og 0 stig ekki neðstar því Fjölnisstúlkur úr Grafarvoginum eru með markatöluna 1-26 og sama stigafjölda. Hlýtur að vera talsverð tilhlökkun í innbyrðisleik liðanna meðal grindvískra fótknattleiksmeyja. Stefna fram sameinuðu liði Kvennadeildir Keflvíkinga, Reynismanna og Víðis í knattspyrnu hafa sameinast um að tefla fram sameiginlegu liði undir merkinu RKV en bæði Reynismenn og Keflvíkingar hafa þurft að upplifa að leggja deildirnar niður eftir að hafa komist í úrvalsdeild kvenna. RKV-liðið, sem leikur jafnan heimaleikina í Keflavík, hefur það sem af er unnið, tapað og gert jafntefli en 3. umferðir hafa verið leiknar. Þá er liðið enn í bikarkeppninni eftir 7-5 sigur gegn Selfyssingum í framlengingu. Burst hjá Njarðvíkingum Njarðvíkingar burstuðu Þrótt Vogum 2-8 á útivelli sl. föstudag. Njarðvíkingar fengu þrjú mörkin hvor frá Óla Þór Magnússyni og Sævari Eyjólfssyni og Högni Þórðarson skoraði 2. Þróttarar eru að fá á sig rúmlega 5 mörk að meðaltali á leik og sitja nú sem fastast í botnsæti riðilsins. Reynismenn skiluðu GG mönnum í annað neðsta sæti riðilsins 4-1 sama kvöld. GG menn eru trúir nafngiftinni og fá á sig skolla í hverjum leik þessa dagana nema á þessum par-fimm leikjum gegn toppliðunum. Leikið á föstudag Njarðvík og Reynir reyna fyrir sér á Njarðvíkurvelli, GG tekur á móti Bruna og þróttlausir Þróttarar mæta Víkingum á Ólafsfjarðarvelli. Allir leikirnir hefjast kl. 20. Víðismenn að missa flugið Eftir frábæra byrjun hafa Víðismenn lækkað flugið aðeins og komu niður í heiðhvolfið í síðustu viku eftir 0-2 tapleik gegn Fylkismönnum á heimavelli. Í kvöld fá þeir tækifæri til að leggja úrvalsdeildarliðið Víkinga í bikarnum en stóru Suðurnesjaliðin Keflavík og Grindavík hafa aðeins náð að kreista eitt stig af Víkingum það sem af er. Á laugardag sækja þeir síðan FH-inga heim í deildinni en mikilvægt er ná ásættanlegri lofthæð aftur áður en málmþreyta sest í Víðisþotuna.
