Valur valtaði yfir Keflavík

Fyrri hálfleikurinn í leik Valsmanna og Keflvíkinga fer seint í sögubækur fyrir blússandi sóknarleik og taumlausa skemmtun. Liðin voru varkár í öllum sínum aðgerðum, Keflvíkingar öllu líklegri til afreka, en Valsmenn létu nokkrum sinnum að sér kveða þegar þeir náðu að keyra hratt á vörn gestanna. Marktækifærin voru af skornum skammti, liðin fengu bæði hálffæri í fyrri hálfleik, en vantaði kraft og þor.?

Vonir og væntingar áhorfenda til meiri skemmtunar voru uppfylltar strax á upphafsmínútum síðari hálfleiks. Kolbeinn Kárason kom Valsmönnum yfir eftir tveggja mínútna leik, skoraði þá með ágætu skoti fyrir utan teig sem Ómar Jóhannsson í marki Keflavíkur missti undir sig. Tæpum tveimur mínútum síðar stormuðu Valsmenn í sókn á nýjan leik, Brynjar Kristmundsson skeiðaði þá inn á teig og lagði boltann fyrir Matthías Guðmundsson, sem var dauðfrír og skoraði af öryggi.

Mörkin tvö virtust slá Keflvíkinga út af laginu og þriðja mark Valsmanna leit dagsins ljós á 60.mín. Kolbeinn Kárason skoraði þá magnað mark, tróð sér inn á teiginn hjá Keflvíkingum og tók skot þegar Ómar markvörður virtist reikna með fyrirgjöf. Boltinn fór í Ómar og þaðan í netið, 3-0 fyrir Valsmenn. Fátt markvert gerðist á síðustu mínútum leiksins fyrr en í blálokin, Keflvíkingar virtust einbeita sér að því fyrst og síðasta að forðast stærra tap, en Valsmenn negldu síðasta naglann í kistuna þegar varamaðurinn Kristinn Freyr Sigurðsson skoraði tveimur mínútum fyrir leikslok. Valsmenn fögnuðu því sannfærandi og sanngjörnum sigri á Keflvíkingum, 4-0.

Texti: sport.is