Valur mætir í Ljónagryfjuna

Einn albesti körfuknattleiksmaður sem Íslendingar hafa átt er Valur Ingimundarson. Hér á árum áður lék hann með Njarðvíkingum og vann með þeim til fjölda Íslands- og bikarmeistaratitla. Valur er m.a. stigahæsti leikmaður efstu deildar frá upphafi en hann þótti jafnvígur undir körfunni og fyrir utan þriggja stiga línuna. Valur hefur einnig þjálfað lið Njarðvíkinga til sigurs í úrvalsdeild en nú stundar hann iðju sína í Borgarnesi.

Víkurfréttir höfðu upp á Val og lögðu fyrir hann nokkrar spurningar um deildina í vetur og margt annað.

Hvernig líst þér á komandi leiktíð? Hverjir munu berjast um hituna og hverjir slást við falldrauginn?
Að venju verða það Suðurnesjaliðin sem slást um titlana og ég sé í rauninni engin önnur lið blanda sér í þá baráttu, það væri þá helst KR. Fallbaráttan á eftir að vera hörð, og ég tel að 5 til 6 lið geti lent þar. Af því sem ég hef séð þá sýnist mér Hattarmenn vera líklegastir til að falla.

Hvernig metur þú þína menn? Munið þið gera atlögu að titlinum?
Okkar lið er töluvert mikið breytt, af þeim 8 leikmönnum sem léku mest í fyrra eru aðeins 2 eftir en það er bara landslagið hér, væntingar okkar til að vinna titla eru ekki miklar en hver veit?

Hvað finnst þér um breytinguna úr tveimur könum á hvert lið í einn?
Mér finnst það mjög gott mál, helst engan.

Leikmenn eins og Jón Arnór, Logi Gunnarsson, Hlynur Bærings, Jakob Sigurðs og Sigurður Þorvaldsson ásamt Pavel eru komnir með samninga erlendis. Telur þú að útflutningstímabil á íslenskum körfuknattleiksmönnum sé hafið?
Við fáum fleiri atvinnumenn ef Íslendingar eru í aðalhlutverkum í sínum liðum.

Þínar ráðleggingar til ungra körfuknattleiksiðkenda:
Æfa, æfa og æfa, stæla það sem meistaraflokksmennirnir eru að gera.

Valur og lærisveinar hans mæta gömlu félögum Vals úr Njarðvík í fyrstu umferð úrvalsdeildarinnar á fimmtudaginn kemur. Leikurinn hefst kl. 19:15 í Ljónagryfjunni og þá verður deildarkeppnin komin með nýtt nafn en KKÍ mun tilkynna hvert það verður í dag.

VF-myndir/
Mynd 1: Valur (fyrir miðju) ásamt Rondey Robinson (t.v.) og Brynjari Sigurðssyni (t.v.).
Mynd 2: Valur treður með tilþrifum í Ljónagryfjunni.