Útlitið svart hjá Keflvíkingum

Keflvíkingar urðu að sætta sig við ósigur gegn Íslandsmeisturum Stjörnunnar í 10. umferð Pepsí deildar karla er liðin mættust á Nettóvellinum í kvöld. Sigurinn var sanngjarn, Stjarnan fékk ógrynni færa og hefði sigurinn hæglega getað orðið stærri en raun bar vitni. Lokatölur urðu 1-2 fyrir gestina.

Leikurinn fór fjörlega af stað þar sem að Stjarnan fékk nokkur ákjósanleg færi til að komast yfir en það var ekki fyrr en á 25. mínútu sem að ísinn var brotinn þegar Jeppe Hansen skoraði fyrsta mark leiksins eftir sendingu frá Arnari Má Björgvinssyni. 

Jeppe var svo nálægt því að bæta við öðru marki á 35. mínútu en skalli hans hafnaði í markslánni. Það voru þó Keflvíkingar sem að jöfnuðu metin nokkuð gegn gangi leiksins þegar Sigurbergur Elísson skoraði með skalla eftir hornspyrnu. Staðan í hálfleik var því 1-1.

Síðari hálfleikur var ekki nema 2ja mínútna gamall þegar Stjarnan hafði tekið forystuna á nýjan leik og var þar að verki Arnar Már Björgvinsson eftir sendingu frá Ólafi Karli Finsen.

Fyrirliði Keflvíkinga, Haraldur Freyr Guðmundsson, þurfti svo að yfirgefa völlinn á 50. mínútu eftir að hafa orðið fyrir meiðslum og þurfti Einar Orri Einarsson að færa sig í miðvörðinn í hans stað. Stjörnumenn fengu nokkur dauðafæri síðustu 20 mínúturnar til að gera algjörlega úti um leikinn en náðu ekki að koma boltanum í netið og urðu lokatölur leiksins 1-2, Stjörnunni í vil.

Keflvíkingar eru þar með komnir í virkilega slæm mál, sitja aleinir á botni deildarinnar og eru 4 stigum frá næsta liði. Varnarleikur heimamanna var jafn slakur og hann hefur verið í nær allt sumar og náðu Stjörnumenn að sauma sig næsta auðveldlega í gegn í hvert sinn sem tækifæri gafst. 

Útlitið er orðið svart sem nóttin og næsta víst að eitthvað stórkostlegt þarf að eiga sér stað í herbúðum Keflavíkur til að eitthvað annað en fall í 1. deild verði hlutskipti liðsins í sumar.