Upphitun fyrir undanúrslitin

Keflvíkingar heimsækja Víkinga í 11. umferð og Pepsi-deildarinnar í dag, mánudaginn 14. júlí.  Leikurinn fer fram á Víkingsvelli og hefst kl. 19:15.  Fyrir leikinn eru liðin í 4.-5 sæti deildarinnar með 16 stig. Það verður því væntanlega hart barist í Víkinni en liðin eigast einnig við í undanúrslitum bikarkeppninnar í lok mánaðar. Með sigri geta Keflvíkingar jafnað KR-inga að stigum. Hér að neðan má sjá yfirlit yfir viðureignir liðanna undanfarin ár en heimasíða Keflavíkur tók saman.

Efsta deild
Keflavík og Víkingur hafa leikið 42 leiki í efstu deild, þann fyrsta árið 1970.  Keflavík hefur haft betur í viðureignum liðanna í gegnum árin og unnið 21 leik.  Víkingar hafa sigrað 14 sinnum en sjö sinnum hefur orðið jafntefli.  Markatalan er 66-52, Keflavík í vil.  Stærsti sigur Keflavíkur er 4-0 sigur árið 1979 en stærsti sigur Víkings var 3-0 sigur á Laugardalsvelli árið 1984.  Tveir af leikmönnum okkar í dag hafa skorað gegn Víkingum í efstu deild en Magnús Þorsteinsson og Jóhann Birnir Guðmundsson hafa gert eitt mark hvor.  Það er Ragnar Margeirsson sem hefur gert flest mörk fyrir Keflavík gegn Víking eða níu talsins.

B-deild
Liðin léku saman í B-deildinni árið 2003 og gerðu þá jafntefli í báðum leikjunum, 1-1 og 0-0.

Bikarkeppnin
Liðin hafa leikið þrisvar í bikarkeppninni, árin 1975, 1981 og 2006.  Keflavík hefur unnið alla leikina og er með markatöluna 10-1.  Það styttist síðan í fjórða bikarleik liðanna en þau mætast í undanúrslitum keppninnar síðar í þessum mánuði.

Síðast
Liðin léku síðat bæði í efstu deild árið 2011.  Þá vann Keflavík fyrri leik liðanna á Nettóvellinum 2-1.  Guðjón Árni Antoníusson og Jóhann Birnir Guðmundsson gerðu mörk Keflavíkur en Viktor Jónsson skoraði fyrir Víkinga.  Víkingur vann síðan sinn heimaleik, einnig 2-1.  Þar skoraði Magnús Þorsteinsson fyrir Keflavík en Hörður Bjarnason og Björgólfur Takefusa fyrir Víkinga.

Bæði lið
Það hefur verið lítill samgangur milli Keflavíkur og Víkings í gegnum árin.  Þó hafa Magnús Þormar, Helgi Björgvinsson og Sigurgeir Kristjánsson leikið með báðum liðum.

Síðustu leikir
Úrslit í leikjum Víkings og Keflavíkur á heimavelli Víkinga hafa orðið þessi undanfarin ár:

2011  Víkingur - Keflavík  2-1  Magnús Þorsteinsson
2007 Víkingur - Keflavík 1-2  Þórarinn Kristjánsson og Guðmundur Steinarsson
2006 Víkingur - Keflavík 1-1  Guðmundur Steinarsson
2004  Víkingur - Keflavík 2-3  Þórarinn Kristjánsson 3
2003  (B-deild) Víkingur - Keflavík 1-1  Ólafur Ívar Jónsson
1999  Víkingur - Keflavík 2-1  Zoran Ljubicic
1993  Víkingur - Keflavík  0-1  Óli Þór Magnússon
1989   Víkingur - Keflavík  2-3  Óli Þór Magnússon 2 og Kjartan Einarsson
1988   Víkingur - Keflavík 3-1  Ragnar Margeirsson
1985   Víkingur - Keflavík 2-3  Ragnar Margeirsson 2 og Sigurður Björgvinsson