Upp úr sauð í Grindavík
Liðsstjóri Selfyssinga slapp með gult spjald eftir að hafa gefið þjálfara Grindvíkinga olnbogaskot
Upp úr sauð á lokamínútum leiks Grindavíkur og Selfoss þegar liðsstjóri Selfyssingi fór úr boðvangi þeirra, inn í boðvang Grindvíkinga og slær boltann úr höndum boltastráks sem honum þótti ekki vera nógu röskur við að koma boltanum í leik og sagði hann vera að tefja. Við þennan yfirgang Selfyssingsins kom til orðaskipta milli liðsstjórans og bekks Grindvíkinga sem urðu til þess að liðsstjórinn gaf Sigurbirni Hreiðarssyni, þjálfara Grindvíkinga, bylmingsolnbogaskot. Við það reiddist einn úr starfsliði Grindvíkinga og fékk hann að líta rauða spjaldið eftir þessi viðskipti þótt upphafsaðilinn slyppi einungis með gult spjald.
Páll Orri Pálsson, ljósmyndari Víkurfrétta, var á Grindavíkurvelli og náði eftirfarandi myndasyrpu af uppákomunni sem segir meira en mörg orð.
Fleiri myndir úr leik Grindavíkur og Selfoss má sjá í eftirfarandi myndasafni sem Páll Orri Pálsson, ljósmyndari Víkurfrétta, tók á leiknum.
Grindavík - Selfoss (1:0) | Lengjudeild karla 3. júní 2021
