Unndór þjálfar Grindavíkurstúlkur

Unndór Sigurðsson mun þjálfa kvennalið Grindavíkur í körfuknattleik á næsta ári, en hann skrifaði undir eins árs samning við félagið á dögunum.
Unndór, sem er Grindvíkingur í húð og hár, þjálfaði lið ÍS með góðum árangri í fyrra, en sagðist í samtali við Víkurfréttir vera glaður með að fá tækifæri til að þjálfa sitt lið. „Það er gaman að vera kominn heim og við erum bjartsýn með framhaldið. Leikmannamálin eru svolítið óráðin núna en við búumst við því að þau mál leysist á næstu vikum.“ Eins og þegar hefur komið fram í Víkurfréttum munu nöfnurnar Erla Reynisdóttir og Erla Þorsteinsdóttir ekki leika með liðinu næsta vetur og munar um minna, en þegar hefur verið tekin ákvörðun um að vera með bandarískan leikmann allt frá byrjun vetrar.

Þá sagði Unndór að hinar ungu og efnilegu stúlkur sem hafa verið í hópnum síðastliðin ár muni spila stærra hlutverk í liðinu en á liðnum árum, en yngri flokkar félagsins hafa verið með þeim sterkustu á landinu undanfarin ár.