Tveir tapleikir í röð í ljónagryfjunni

Njarðvíkingar töpuðu fyrir nýliðum Vals, 66:70, á heimavelli í gær en þetta var annar tapleikur liðsins í röð í ljónagryfjunni. Leikurinn var jafn til að byrja með og heimamenn oftast skrefinu á undan. Gestirnir komu hins vegar ákveðnir til leiks um miðjan annan leikhluta og komust yfir og leiddu í hálfleik, 31:38. Valsmenn héldu forskotinu í síðari hálfleik og þrátt fyrir ágæta tilraun heimamanna til að jafna í lokin tókst það ekki og óvænt tap raunin.
Njarðvíkingar mættu mjög slappir til leiks og hafa eflaust talið þetta verkefni auðvelt. Enginn leikmaður liðsins, að Ragnari Ragnarssyni undanskildum, lék af réttri getu og verður það að teljast nokkuð áhyggjuefni þar á bæ ef menn mæta ekki með réttu hugarfari í leikina.

Friðrik Ragnarsson þjálfari Njarðvíkinga var ekki sáttur að leik loknum og sagði einbeytingarleysi ástæðu tapsins. "Ég held að við höfum ekki vanmetið Val heldur mættum við illa stemmdir til leiks og einbeytingin var ekki til staðar. Þetta er annar leikurinn í röð sem við mætum svona illa stemmdir og ef þetta breytist ekki verðum við fyrir neðan miðja deild".
Hvernig rífur þú mannskapinn upp eftir svona tap?
"Það er ýmislegt hægt að gera og ég hef í raun engar áhyggjur á því að við náum ekki að rífa okkur upp. Nú þurfum við bara að spíta í lófana. Það er hellingur sem þarf að laga þá sérstaklega í sókninni þar sem við höfum skorað lítið á heimavelli í tveimur leikjum í röð. Það er auðvitað alltaf sárt að tapa á heimavelli en það versta er að við erum að vinna erfiðu leikina á meðan við töpum þeim auðveldari".
Hvernig leggst framhaldið í þig?
"Ágætlega, við eigum eftir að slípast betur og koma sterkir til baka. Ég vissi að byrjunin gæti verið erfið enda erum við með mikið breytt lið. Við erum þó að tapa röngum leikjum og það er slæmt. Við þurfum að koma stemmningunni aftur í liðið enda er hún mikilvægt vopn í okkar leik".
Að lokum, er Teitur Örlygsson að byrja aftur?
"Það er aldrei að vita með Teit. Ég tel ágætar líkur á því að hann byrji aftur en það mun koma í ljós fljótlega".

Þessir skoruðu mest: Pete Philo 18 stig, Ragnar Ragnarsson 16, Halldór Karlsson 12 og Friðrik Stefánsson 11.