Tók út reiði sína á markstönginni
Vonbrigði Eyjamanna voru mikil í Keflavík á laugardag þegar ÍBV mætti Keflavík í lokaumferð Íslandsmótsins, Pepsi-deildinni, í knattspyrnu. Sigur Eyjamanna á Keflavík hefði tryggt Vestmannaeyingum Íslandsmeistaratitilinn. Gestirnir sáu hins vegar aldrei til sólar í leiknum og frábært Keflavíkurliðið kafsigldi Eyjapeyja og lokastaðan var 4-1 fyrir Keflavík.
Það var því þungt í Eyjamönnum í leikslok, sumir felldu tár á meðan aðrir tóku út reiði sína með því að sparka ítrekað af öllu afli í markstöngina. Annar leikmaður Eyjamanna sparkaði sig niður úr grasinu á Keflavíkurvellinum og öskraði svo á ljósmyndara Víkurfrétta og sagði honum að taka mynd af skemmdunum. Ljósmyndarinn tók hins vegar ekki þátt í reiði leikmannsins en meðfylgjandi myndir sýna stemmninguna í liði Eyjamanna í leikslok.
Víkurfréttamyndir: Hilmar Bragi
Markstöngin átti ekki sjö dagana sæla á laugardaginn!
