„Þurfum að varast skytturnar þeirra“ - segir Jón N. Hafsteinsson um leikinn í kvöld

Keflavík og Grindavík spila í kvöld kl. 20:00 annan leik liðanna í undanúrslitum Epson-deildarinnar í körfu. Það mun koma til með að mæða mikið á Jóni N. Hafsteinssyni í leiknum enda er hann lykilmaður í liði Keflvíkinga og í raun eini „stóri“ leikmaður liðsins. Jón sagði í viðtali við vf.is að hann væri farinn að hlakka til að spila leikinn....„Þetta leggst mjög vel í mig eins og alltaf. Þetta verður mjög gaman og við munum gera allt til þess að vinna leikinn og komast í 2-0. Það helsta sem við þurfum að varast eru skytturnar þeirra, Páll Axel, Guðlaugur og Helgi Jónas, en við þurfum að leggja áherslu á að stoppa þá því annars er voðinn vís“.

Þú hefur verið meiddur í síðustu leikjum og í raun haltrað þetta á einni löpp ertu orðinn góður?
„jaa svona, löppin er aðeins að angra mig en það er hlutur sem ég reyni að gleyma þegar ég stíg inn á völlinn og byrja að spila“.

Hvernig undirbýrðu þig fyrir svona leiki?
„Ég geri nú ekkert sérstakt, tek því bara rólega og býð eftir að leikurinn byrji“.