Þróttur í Vogum vill festa sig í sessi í 2. deildinni

Þróttur í Vogum hefur náð eftirtektarverðum árangri í knattspyrnunni undanfarin ár en þetta litla bæjarfélag var með lið í Lengjudeildinni, næst efstu deild í knattspyrnu á Íslandi 2022. Þeir hafa verið ofarlega í 2 deildinni síðan þá og voru aðeins einu stigi frá öðru sætinu í fyrra, sem hefði fært þá upp um deild. Miklar breytingar hafa orðið á leikmannahópnum á milli tímabila og auk þess leyfðu Þróttarar þjálfaranum Gunnari Má Guðmundssyni, oft nefndur hr. Fjölnir, að taka við sínu uppeldisfélagi í vetur. Nýr þjálfari tók við í mars, FH-ingurinn Auðun Helgason.

Auðun er uppalinn FH-ingur, lék um tíma sem atvinnumaður erlendis og lauk leikmannferlinum samhliða þjálfun en hann var ekki búinn að þjálfa í nokkur ár þegar kallið kom frá Marteini og félögum úr Vogum.

„Ég var síðast að þjálfa þegar ég bjó á Hornafirði og var með lið Sindra 2015 og 2016. Ég tók skóna fram á ný og náði því að spila þar til ég varð 42 ára gamall. Ég rak eigin lögmannsstofu á Hornafirði en flutti aftur suður 2020 og hef sinnt lögmennskunni síðan þá. Ég var staddur í fríi á Spáni þegar Marteinn hringdi í mig og ég fann strax hvernig fótboltabakterían blússaði upp í mér. Ég fann að ég var til í slaginn, byrjaði í mars og hlakka til að vinna með þessu frábæra fólki í Vogum. Við viljum standa okkur fyrir samfélagið, það er mjög vel hugsað um okkur. Starfsfólk íþróttamiðstöðvarinnar hefur tekið mjög vel á móti okkur, það er búið að taka klefann okkar í gegn fyrir sumarið og erum við mjög þakklátir fyrir það.

Ég tek við góðu búi af Gunnari Má, sem bauðst að taka við uppeldisfélagi sínu, Fjölni. Það urðu einhverjar breytingar á leikmannahópnum frá því í fyrra eins og gengur og gerist en í fyrsta leik tímabilsins voru átta í byrjunarliði sem voru í fyrra. Við fengum inn unga og bráðefnilega leikmenn sem vilja taka næstu skref á sínum ferli. Ég tók við fyrir tveimur mánuðum, hefði auðvitað vilja taka fullt undirbúningstímabil en við mætum fullir sjálfstrausts og bjartsýnir til leiks. Andinn í hópnum er frábær og mikil tilhlökkun í mannskapnum.

Árangur þessa félags hefur verið eftirtektarverður undanfarin ár og ég hlakka mikið til að starfa fyrir það. 2. deildin hefur styrkst mikið á undanförnum árum og verður mjög sterk í ár. Við ætlum okkur að vera í efri hlutanum en erum ekki með yfirlýst markmið um að komast upp. Það sem Þróttur vill gera er að gera sig gildandi í 2. deildinni en eins og í fyrra þar sem liðið var mjög gott og möguleiki var á að fara upp, þá er að sjálfsögðu látið á það reyna.

Byrjunin á tímabilinu var mjög góð, við gerðum góða ferð upp á Skaga og unnum 1-2 sigur á liði Kára, þeir minnkuðu muninn á fimmtu mínútu í uppbótartíma svo sigurinn var öruggur. Það var góð mæting Vogabúa á þennan leik og trúi ég ekki öðru en Vogabúar fjölmenni á fyrsta heimaleikinn sem er á morgun, laugardag gegn Dalvík/Reyni. Við erum brattir fyrir sumarið,“ segir Auðun.