Thomas meiddur og heldur heim
Bandaríkjamaðurinn Steven Thomas er meiddur og er á förum til síns heima. Hann mun því ekki leika meir með Grindvíkingum á þessari leiktíð að því er fram kemur á vefsíðunni www.umfg.is
Steven er meiddur í baki en hann meiddist í Stjörnuleik KKÍ og eftir læknisskoðun er talið að það taki hann 3-6 vikur að jafna sig að fullu og það er of langur tími þar sem margir erfiðir leikir bíða Grindvíkinga á næstunni.
Á vefsíðu Grindavíkur segir að ekki sé loku fyrir það skotið að Thomas snúi aftur í raðir Grindvíkinga en það verður þá ekki fyrr en á næstu leiktíð. Steven lék 13 leiki með Grindavík í Iceland Express deildinni og gerði í þeim 20,9 stig að meðaltali í leik og tók að jafnaði í þeim 10,4 fráköst í leik.
Grindvíkingar leita nú að öðrum bandarískum leikmanni og segja að hann verði kominn fyrir undanúrslitaleikinn gegn ÍR í Lýsingarbikarnum sem fram fer á sunnudag.
VF-mynd/ [email protected] - Thomas í leik gegn Njarðvík fyrr á tímabilinu
