Tekur Teitur við Njarðvíkingum?

Teitur Örlygsson er sterklega orðaður við körfuknattleikslið Njarðvíkur í Fréttablaðinu í dag þar sem greint er frá því að allt bendi til þess að hann verði næsti þjálfari liðsins. Sjálfur segir Teitur í samtali við Fréttablaðið að hann sé klár í slaginn núna og að hann langi rosalega mikið til þess að taka starfið að sér.

 

Taki Teitur við Njarðvíkingum verður það í fyrsta skipti sem hann þjálfar lið upp á sitt einsdæmi en hann og Friðrik Ragnarsson þjálfuðu Njarðvíkinga saman leiktíðina 2001 en þá var Teitur ennþá leikmaður.

 

Einar Árni Jóhannsson, fyrrum þjálfari Njarðvíkinga tilkynnti það fyrir skömmu að hann myndi ekki vera áfram með liðið og beinast nú öll spjót að Teiti Örlygssyni. Hann segir ennfremur við Fréttablaðið í dag að hann eigi eftir að funda með forsvarsmönnum KKD UMFN og að hann komi sterklega til greina sem næsti þjálfari liðsins og sé gríðarlega spenntur fyrir því verkenfi.

 

Heimild: www.visir.is – Fréttablaðið í dag

 

VF-mynd/ Úr safni: Í þá gömlu góðu!