Tap í framlengingu

Njarðvíkingar töpuðu fyrir Snæfellingum í Stykkishólmi í framlengdum leik í gær, 88-84.

Eftir tapið eru Njarðvíkingar í 3. sæti deildarinnar, 4 stigum á eftir Snæfelli og 6 á eftir meisturum Keflavíkur.

Heimamenn byrjuðu mun betur og voru með 6 stiga forskot eftir fyrsta leikhluta, 27-21 þar sem varnarleikurinn hjá Njarðvíkingum var ekki eins og best var á kosið.

Njarðvíkingar jöfnuðu þó metin í öðrum leikhluta en Snæfellingar tóku við sér á ný og leiddu í hálfleik, 42-73. Stóru mennirnir hjá Njarðvík, Friðrik Stefánsson og Páll Kristinsson lentu í miklum villuvandræðum sem háði liðinu í seinni hálfleik sem var jafn og spennandi þar sem liðin skiptust á að leiða.

Mikil spenna var á lokasekúndunum en Njarðvíkingar náðu 2ja stiga forskoti, 76-78, þegar um hálf mínúta var til loka venjulegs leiktíma. Heimamenn svöruðu með tveimur vítum og sendu leikinn í framlengingu. Þar settu Snæfellingar tvær stórar 3ja stiga körfur sem gerðu út um leikinn.

Einar Árni Jóhannsson, þjálfari, var í sjálfu sér ekki ósáttur við leik sinna manna þó hann hefði að sjálfsögðu viljað önnur úrslit. „Við komum auðvitað til að sigra þennan leik,“ sagði Einar sem vildi gera sem minnst úr „Snæfellsgrýlunni“. „Það var margt jákvætt í leiknum hjá okkur og í heildina er ég ánægður með kraftinn og baráttuna hjá okkur. Nú höldum við bara okkar striki og mætum tilbúnir í næsta leik sem er gegn Fjölni á sunnudag.“