Taka Keflvíkingar titilinn?

Keflavík og Snæfell mætast í dag kl. 16 í fjórða leik liðanna í úrslitum Íslandsmótsins í körfuknattleik. Leikurinn fer fram í Íþróttahúsinu við Sunnubraut og geta Keflvíkingar tryggt sér titilinn með sigri.

Bæði lið eru með menn í leikbanni þar sem Corey Dickerson og Arnar Freyr Jónsson munu ekki taka þátt í leiknum. Snæfell tapar þó augljóslega meira á því vegna þess að Dickerson hefur verið einn af máttarstólpum liðsins í vetur og þó að Arnar hafi átt góða spretti í vetur hefur Keflavíkurliðið breidd til að fylla í skarðið sem hann skilur eftir sig. Hjörtur Harðarson snýr aftur úr meiðslum fyrir þennan leik, en hann hefur  ekki spilað síðan í 8-liða úrslitum vegna veikinda.

Keflvíkingar standa nú með pálmann í höndunum þar sem heimavöllur þeirra er feiknasterkur, en þeir verða að gæta þess að ofmetnast ekki því ef það er eitthvað sem Snæfellsliðið hefur sýnt í vetur er það að þeir gefast aldrei upp þótt á móti blási og þeir koma inn í leikinn með engu að tapa og allt að vinna og þannig getur allt gerst.
Það eina sem hægt er að gefa sér fyrir þennan leik er að þar verður baráttan í fyrirrúmi og er óhætt að lofa taumlausri skemmtun hvernig sem fer.

Ýmsar uppákomur verða í sambandi við leikinn t.a.m. mun hljómsveitin Safnaðarfundur eftir messu þruma upp stemmningunni fyrir leik og munu ungar stúlkur úr fimleikadeildinni sýna listir sínar í leikhléi. Keflvíkingar hafa bætt við sætum fyrir aftan körfurnar til að nóg verði af sætum fyrir áhorfendur og er fólki ráðlagt að mæta í fyrra lagi til að tryggja sér sæti, en Sláturhúsið opnar kl. 15.