Suðurnesjakylfingarnir úr leik

Íslandsmótið í holukeppni í golfi fer nú fram á Urriðavelli í Garðabæ og er skemmst frá því að segja að allir Suðurnesjakylfingarnir eru úr leik. Heiða Guðnadóttir, nýkrýndur Íslandsmeistari í höggleik kvenna 16-18 ára, datt út í fyrstu umferð en Örn Ævar Hjartarson mátti sætta sig við að detta út í 16 manna úrslitum eftir bráðabana.

 

Örn Ævar mætti hinum þaulreynda Sigurði Péturssyni í bráðabana. Sigurður og Örn Ævar voru jafnir eftir 18 holur og héldu því áfram. Fengu báðir par á fyrstu holu í bráðabana en Sigurður fékk par á annarri holunni í bráðabananum þar sem Örn varð að sætta sig við skolla og því komst Sigurður áfram í 8 manna úrslit.

 

Stutt og laggott hjá Suðurnesjamönnum að þessu sinni og ljóst að Íslandsbikarinn í holukeppni í karlaflokki er á leiðinni frá Suðurnesjum þar sem Örn Ævar átti titil að verja í keppninni.

 

VF-mynd/ Jón Björn Ólafsson – [email protected] – Örn Ævar og Sigurður takast í hendur að loknum bráðabananum fyrr í dag.

 

Nánar um mótið á www.kylfingur.is