Suðurnesjakrakkar gera það gott í Svíþjóð

Íslensku liðin á Norðurlandamóti unglinga í körfuknattleik hafa staðið sig afar vel það sem af er og unnið flesta sína leiki.
Suðurnesjakrakkar eru áberandi eins og fram hefur komið og eru burðarásar í sínum liðum.

Í gær unnu strákarnir í U-16 liðinu báða leiki sína, Gegn Noregi og Danmörku, og í dag unnu þeir Finna örugglega og tryggðu sér sæti í úrslitunum. Hjörtur Hrafn Einarsson frá Njarðvík var stigahæstur liðsins í öllum leikjunum og eins stóðu Rúnar Ingi Erlingsson og Þröstur Leó Jóhansson, Keflavík, sig vel.

U-16 liði stúlkna hefur ekki gengið eins vel, en þar eru fjórar Grindavíkurstúlkur og ein frá Njarðvík. Þær unnu sinn fyrsta leik í dag eftir þrjú töp í fyrstu leikjunum og var Margrét Kara Sturludóttir, Njarðvík, stigahæst með 15 stig og 12 fráköst. Íris Sverrisdóttir, Grindavík, var henni næst með 13 stig.

U-18 lið stúlkna tryggði sér sæti í úrslitunum með sigri á Finnum í spennandi leik í gær, 99-95, þar sem Bryndís Guðmundsdóttir, Keflavík, skoraði 23 stig og tók 12 fráköst. Í dag kórónuðu þær frammistöðuna með því að rústa Noreg, 80-57.

Auk þess hefur U-18 lið drengja svo gott sem tryggt sig í úrslitin, en þar eru engir Suðurnesjamenn.

Gengið á mótinu hefur verið afskaplega gott og hafa Íslendingar stimplað sig enn betur inn sem ein fremsta körfuboltaþjóð Norðurlanda.