"Stuðningsmannsveitin" hvetur Keflvíkinga að fjölmenna á körfuboltaleikina

Nokkrir gallvaskir stuðningsmenn Keflavíkurliðsins í körfuknattleik, sem kalla sig "Stuðningsmannasveitina", hafa ákveðið að senda fylgjendum Keflavíkur áskorun þess efnis að þeir fjölmenni á næstu leiki í körfunni og styðji við bakið á liðinu í baráttunni sem framundan er. Þeir félagar hafa verið duglegir við að mæta á leiki með trommur og annað tilheyrandi til að halda uppi stuðinu á pöllunum og munu þeir halda því áfram nk. laugardag þegar Keflvíkingar mæta ÍR í 4-liða úrslitum bikarkeppni KKÍ og Doritos.Já kæru Keflvíkingar nú er komið á undanúrslitunum bikarsins á laugardag á móti ÍR og þarf Keflavíkurliðið á öllum okkar stuðning að halda. Þá erum við ekki bara að tala um okkur drengina í "Stuðningsmannasveitinni" heldur ALLA fylgismenn Keflavíkurliðsins! Það hefur svolítið borið á því í gegnum tíðina að það séu ekki allir "jafn miklir stuðningsmenn" þ.e.a.s menn sem mæta bara á leikina og sitja þarna eins og steindauðar skötur og ætlast til þess að Keflavík vinni leikina hjálparlaust. Þeir geta ekki einu sinni séð það í sér að láta aðeins í sér heyra á meðan leik stendur. Sem betur fer eru ekki margir svona áhorfendur á meðal fylgismanna Keflavíkur en það hefur stundum borið á þessu, en þá er bara um að gera að taka þetta til sín og mæta tvíefldir á næsta leik, ekki satt?

Keflvískir áhorfendur hafa þó oftast fylgt sínu liði vel og verið viðstaddir alveg fjölmarga frábæra sigra liðsins á undanförnum árum. Því viljum við bara skora á alla Keflvíkinga að mæta vel og láta heyra hressilega í sér það sem eftir lifir þessa tímabils og hjálpa Keflavíkurliðinu að vinna alla þá titla sem í boði eru.

Allir í Stuðningsmannasveitinni vilja skora á áhorfendur, hvort sem þeir sitja uppi í stúkunni eða niðri, að skrúfa frá barkanum og láta vel í sér heyra á laugardaginn næstkomandi. Næsti bikar á dagskrá hjá okkur er Bikarmeistaratitillinn og ætlum við okkur hann þann 8. febbrúar í Höllinni, það er engin spurning!
Einnig viljum við skora á Keflvíkinga að fjölmenna á kvennaleikinn í Grindavík á föstudag og koma þeim í úrslitin því það væri ekki amalegt að fá tvöfaldan leik í Höllinni líkt og við gerðum á móti KR hér um árið. Við skorum að lokum á leikmenn liðsins að taka þátt í leiknum af meiri líf og sál, líkt og Falur Harðarson gerði í síðasta leik, því það liftir stuðningsmönnunum upp!

Áfram Keflavík!

Jói, Beggi, Kristinn, Einar, Bjössi og allir hinir í "Stuðningsmannasveitinni"


Texti við lagstubb sem við syngjum á leikjum:

Við styðjum Keflavík
lalalala
Við styðjum Keflavík
laaaalalalala
Við styðjum Keflavík
lalalala
Og við munum vinna þennann leik
"TROMMUR"
KEFLAVÍK (öskur)
"TROMMUR"
OG SVO FRAMVEGIS