Stúdínur sterkari á endasprettinum

Njarðvíkurstúlkur töpuðu fyrir Stúdínum í gærkvöld. Leikurinn fór fram í Ljónagryfjunni og endaði með sjö stiga sigri gestanna 60-67.

Stúdínur hófu leikinn mun betur en Njarðvíkurstúlkur náðu að klóra í bakkann og minnka muninn fyrir hálfleik með því að vinna annan leikhluta 17-6. Liðin gengu til hálfleiks þar sem Stúdínur höfðu betur í stöðunni 32-36.

Agnar Mar Gunnarsson stjórnaði liði Njarðvíkur í gær í fjarveru Jóns Júlíusar Árnasonar sem er farinn í frí um óákveðinn tíma.

Í seinni hálfleik var mikil spenna í leiknum og þegar tvær mínútur voru til leiksloka var munurinn einungis tvö stig á liðinum. Stúdínur brutu þó ísinn að lokum og fóru því með stigin tvö til Reykjavíkur. Jamie Woudstra var stigahæst í liði Njarðvíkur með 26 stig en í liði ÍS var Alda Jónsdóttir með 21 stig og Lovísa Guðmundsdóttir með 20.

„Stelpurnar stóðu sig mjög vel og voru skiljanlega svekktar yfir því að tapa leiknum, við erum engu að síður búin að sýna að við erum sýnd veiði en ekki gefin,“ sagði Agnar Mar í samtali við Víkurfréttir í gærkvöld.

Sem stendur þá eru Njarðvíkurstúlkur í 4. sæti deildarinnar með tvö stig eftir sigur á KR. Næsti leikur Njarðvíkur er þann 11. nóvember að Ásvöllum gegn Haukum.

Tölfræði leiksins

VF-mynd/ úr safni: úr leik Njarðvíkur og Grindavíkur fyrr á tímabilinu