Stórtap Keflvíkinga

Keflavíkurstúlkur voru yfirspilaðar frá fyrstu mínútu í 7-0 tapi gegn Valsstúlkum í gær.

Margrét Lára Viðarsdóttir skoraði fyrstu tvö mörk leiksins áður en fimm mínútur voru liðnar af leiknum og eftir það var aldrei litið til baka. Valur bætti þriðja markinu við áður en langt um leið og var staðan 3-0 í hálfleik. Í seinni hálfleik var boðið upp á sömu dagskrá og Valsarar héldu áfram að raða inn mörkunum.

Lokastaðan var svo 7-0 eins og fyrr sagði, en Keflvíkingar eru sem fyrr í 5. sæti deildarinnar.