Stórleikur í Vesturbænum

KR tekur á móti Njarðvíkingum í toppslag Iceland Expressdeildar karla í kvöld og hefst leikurinn kl. 19.15.

Viðureignir liðanna hafa verið frábær skemmtun undanfarin ár og þennan veturinn mæta KR-ingar til leiks sterkari en þeir hafa verið lengi.

Meistararnir eru í miðju hörkuprógrammi þar sem þeir léku Evrópuleik á fimmtudag og eiga annan á miðvikudag. Þannig verður spennandi að sjá hvernig fer, því með sigri komast Njarðvíkingar aftur upp að hlið toppliðanna, þó með einn leik til góða.

KR-ingar hafa ákveðið að gera mikið úr þessum leik og verður skemmtileg umgjörð sem enginn ætti að missa af, m.a. verður boðið upp á pylsur og kók frá Bæjarins bestu.

Auk þess má geta að Keflavík fær Hamar/Selfoss í heimsókn og Grindavík sækir Borgnesinga heim.