Stjörnuleikurinn í Sláturhúsinu með breyttu fyrirkomulagi
Hinn árlegi Stjörnuleikur Körfuknattleikssambands Íslands mun fara fram í Sláturhúsinu í Keflavík næstkomandi laugardag. Í ár verður Stjörnuleikurinn með breyttu sniði þar sem karla- og kvennalandsliðin munu leika gegn úrvalsliðum erlendra leikmanna í bland við aðra íslenska leikmenn. Þjálfarar kvenna- og karlalandsliðanna þeir Sigurður Ingimundarson og Ágúst Sigurður Björgvinsson hafa valið leikmenn sína í landsliðin fyrir leiki helgarinnar. Benedikt Guðmundsson þjálfari Íslandsmeistara KR og Jón Halldór Eðvaldsson þjálfari kvennaliðs Keflavíkur munu svo sjáum að velja úrvalslið skipuð erlendum leikmönnum í bland við íslenska leikmenn sem mæta landsliðunum.
Ágúst Sigurður Björgvinsson hefur valið eftirtalda leikmenn í sinn fyrsta landsliðshóp. Fimm leikmenn landsliðsins koma af Suðurnesjum, tveir frá Keflavík og þrír frá Grindavík.
Kvennalandsliðið:
Fanney Guðmundsdóttir - Hamar
Guðrún Gróa Þorsteinsdóttir - KR
Hildur Sigurðardóttir - KR
Sigrún Ámundadóttir - KR
Ingibjörg Vilbergsdóttir - Keflavík
Margrét Kara Sturludóttir - Keflavík
Jovana Lilja Stefánsdóttir - Grindavík
Ingibjörg Jakobsdóttir - Grindavík
Petrúnella Skúladóttir - Grindavík
Signý Hermannsdóttir - Valur
Unnur Tara Jónsdóttir - Haukar
Kristrún Sigurjónsdóttir - Haukar
Sigurður Ingimundarson hefur valið eftirtalda leikmenn í karlalandsliðið. Sex leikmenn landsliðsins koma af Suðurnesjum, þrír frá Keflavík, tveir frá Njarðvík og einn frá Grindavík.
Karlalandsliðið:
Magnús Þór Gunnarsson - Keflavík
Jón Hafsteinsson - Keflavík
Sigurður Þorsteinsson - Keflavík
Jóhann Ólafsson - Njarðvík
Hörður Axel Vilhjálmsson - Njarðvík
Páll Axel Vilbergsson - Grindavík
Helgi Magnússon - KR
Brynjar Björnsson - KR
Hlynur Bæringsson - Snæfelli
Hreggviður Magnússon - ÍR
Sveinbjörn Claessen - ÍR
Kristinn Jónasson - Fjölnir
Úrvalsliðin verða kunngerð síðar en kvennaleikurinn hefst kl. 13:30 og karlaleikurinn fer fram kl. 15.30.
VF-Mynd/ [email protected] - Magnús Þór Gunnarsson leikmaður Keflavíkur smellir hér af einni eldflaug í Stjörnuleik KKÍ í fyrra. Eftirminnilegt er atvikið þegar Magnús fíflaði miðherjann stæðilega George Byrd upp úr skónum og upp skar hann mikil fagnaðarlæti áhorfenda fyrir vikið. Hver verður fórnarlamb hans um helgina?
