Steinþór Geirdal bikarmeistari í keilu

Keflvíkingurinn Steinþór Geirdal varði bikarmeistaratitil sinn í keilu þegar hann sigraði á Sjóvá-Almennar mótinu sem lauk á miðvikudag í Keilumjódd. Steinþór sigraði einnig í fyrra en þetta er í fyrsta skipti sem keilari ver bikarmeistaratitilinn.

Bikarkeppni Sjóvá-Almennar sem er annað stærsta keilumót landsins er mjög langt og strangt mót. Bikarkeppnin byrjaði í haust með forkeppni þar sem 128 efstu keilararnir komust áfram í úrslit. Þar eru þrír leikir og sá einstaklingur sem er efstur samanlagt í hverju einvígi fer áfram í 64-manna úrslit og svo koll af kolli.
Steinþór fór í gegnum alla úrslitakeppnina og sigraði svo í lokaeinvíginu 608 - 570. Þetta er annað árið í röð sem hann sigrar þessa keppni og verður það að teljast ótrúlegt afrek því úrslitakeppnin er hörð og mikið af leikjum spilaðir. Eins og áður sagði er þetta í fyrsta skipti sem keilari ver bikarmeistaratitil. Steinþór sem býr í Keflavík og stundar nám í FS sagði í samtali við Víkurfréttir að næst á dagskrá væri undirbúningur fyrir HM í U-23 ára sem haldið verður í Tælandi í ágúst. Hann mun verða undir leiðsögn sænsks þjálfara og fer hann til Svíþjóðar í júní.
Steinþór æfir með KFR í Reykjavík enda getur hann ekki æft hér í bæ þar sem enginn aðstaða er fyrir hendi og verður það að teljast skrítið að einn helsti íþróttamaður Suðurnesja geti ekki æft sína íþrótt í sinni heimabyggð vegna þessa.