Stefnir á pall fyrir landsliðið

Guðmundur Juanito Ólafsson byrjaði að æfa ólympískar lyftingar hjá UMFN fyrir einu og hálfu ári síðan og er strax kominn í landslið 20 ára og yngri. Hann hafnaði í 4. sæti á Norðurlandamótinu sem haldið var í Hafnarfirði nýlega en þar lyfti hann 103 kg í snörun og 132 kg í jafnhendingu. Guðmundur stefnir á að komast á pall fyrir landsliðið.

 

Guðmundur er frá Reykjanesbæ og á ættir að rekja til Filippseyja. Hann gerði garðinn frægan með liði Holtaskóla í Skólahreysti en hans lið sigraði þrjú ár í röð, 2011, 2012 og 2013. Hann æfði fótbolta í mörg ár með Keflavík en ákvað svo að tími væri kominn til að prófa eitthvað nýtt. „Í lyftingum er maður mjög oft að sjá bætingar. Ég fór í lyftingarnar út af crossfit því mig langaði að verða betri í þeim lyftum sem eru þar. Svo er líka bara svo góður félagsskapur í þessu,“ segir Guðmundur.

 

Hver er uppáhalds greinin þín í lyftingunum?

Mín uppáhalds grein er „clean and jerk“ eða jafnhending.

 

Áttu þér einhverjar fyrirmyndir í íþróttinni?

Fyrirmyndirnar mínar eru auðvitað bara þeir sem eru á toppnum í þessari íþrótt.

 

Hver eru þín markmið? 

Skammtímamarkmið mín eru að bæta mig í þeim lyftum sem keppt er í og langtímamarkið mitt er að lenda á verðlaunapalli fyrir landsliðið.

 

Hvenær er næsta mót?

Næsta mót sem ég mun keppa á er í desember og það er jólamótið í ólympískum lyftingum.