Sögulegur leikur í Grindavík: Fjögur mörk á fyrstu 12 mínútunum

Grindvíkingar sendu Víkinga aftur niður í 1. deild þegar liðin gerðu 3-3 jafntefli í æði skrautlegum leik á Grindavíkurvelli.

Áhorfendur voru varla búnir að koma sér fyrir í sætum sínum þegar Víkingar komust yfir. Á 2. mín hugðist Óli Stefán Flóventsson koma knettinum af hættusvæði en það vildi ekki betur til en svo að skotið hafnaði í afturenda Grétars Sigurðssonar og sveif í boga yfir hinn unga og efnilega Hjört Pálsson sem stóð á milli stanganna í marki Grindavíkur.

Víkingar hófu leikinn með sterkan meðvind og átti hann eftir að spila stórt hlutverk áður en yfir lauk.

Óskar Örn Hauksson jafnaði leikinn strax á 7. mín, en hann geystist inn í vítateiginn og skaut föstu skoti sem Martin Trancik varði en Óskar náði frákastinu og smellti boltanum örugglega í netið, 1-1.

Engan óraði fyrir því sem gerðist næst, en Vilhjálmur Vilhjálmsson, stórskytta Víkinga, skaut strax frá miðjunni og yfir hinn 17 ára gamla Hjört í markinu og breytti stöðunni í 1-2.

Stórskotahríðinni var ekki lokið með því vegna þess að á 12. mín bætti Grétar Sigurðsson við þriðja marki Víkinga eftir hornspyrnu Vilhjálms. Hjörtur var hreint ekki öfundsverður í markinu, en hann átti eftir að finna sig betur og er greinilega gott og mikið efni þar á ferð.

Víkingar voru nær alráðir á þessum tímapunkti í leiknum og voru sóttu af miklum þunga. Þeir voru óhræddir við að skjóta af löngu færi enda gerði rokið það að verkum að rétt þurfti að lyfta bolta til að úr yrði hættulegt færi.

Grindvíkingar áttu einnig sín færi, en Grétar Hjartarson klúðraði ótrúlegu færi á 36. mín. Hann fékk boltann í teignum, lék á einn varnarmann og plataði Trancik upp úr skónum. Fyrir framan opið markið skaut hann hins vegar framhjá með opið mark fyrir framan sig.

Þegar liðin skiptu um vallarhelminga í seinni hálfleik urðu algjör hamskipti á liðunum. Grindvíkingar sóttu án afláts frá fyrstu mínútu og varði Trancik til dæmis meistaralega frá Grétari á 47. mín. Momir Mileta sendi boltann inn á teig þar sem Grétar fleytti boltanum áfram en markmaðurinn sló boltann í slá og yfir.

Færin komu hvert á fætur öðru þar sem Sinisa Kekic, Grétar, Óskar gerðu sig allir líklega.

Hurðin skall aftur nær hælum Víkinga á 53. mín þegar Gestur Gylfason skaut rétt utan vítateigs, en Trancik var enn réttur maður á réttum stað og varði í horn.

Grindvíkingar fengu aðra hornspyrnu 10 mínútum síðar og Mileta gerði sér lítið fyrir og skoraði beint úr spyrnunni. Enn var vindurinn að skipta sköpum en hornspyrnur Mileta eru nógu hættulegar fyrir. Staðan var orðin 2-3 og deildarsæti Víkinga hélt á bláþræði.

Sóknartilburðir Víkinga voru ekki miklir í seinni hálfleik og höfðu þeir bakkað ótrúlega langt aftur á völlinn þar sem Grindvíkingar pressuðu án afláts. Þá sjaldan sem Víkingar komust í færi sáu varnarmenn eða Hjörtur í markinu ávallt við þeim.

Þögn sló á stuðningsmenn Víkinga á 89. mín þegar Grétar Hjartarson jafnaði leikinn, 3-3.
Þeir höfðu skemmt sér konunglega fram að því og virtust hafa fulla trú á sínum mönnum. Það breyttist þegar Gestur Gylfason sendi boltann í fallegum boga af vinstri kantinum yfir á fjærstöng þar sem Grétar Hjartarson kom svifandi og skallaði boltann framhjá Trancik. Markið kom upp úr engu, en gerði það að verkum að Víkingar misstu af Fram og þurfa því að spila í 1. deild að ári. Það tryggði Grétari einnig Silfurskó KSÍ sem annar markahæsti maður Íslandsmótsins.

Grindvíkingar geta vel við unað eftir leikinn og luku þeir keppni í sjöunda sæti eftir að hafa verið í fallbaráttu mestallt sumarið.

„Ég finn til með Víkingunum, en þeir voru ekki að falla á þessum úrslitum í kvöld,“ sagði Óli Stefán í samtali við Víkurfréttir í leikslok.  Hann sagðist einnig stoltur af Hirti, markmanninum unga, sem fékk sannkallaða eldskírn í kvöld. „Það er alltaf erfitt að spila gegn svona vindi eins og í dag og svo er slæmt fyrir sjálfstraustið að fá svona klaufamark á sig í byrjun, en hann reif sig upp og ég hreinlega dáist að honum eftir frammistöðuna.“