Sigurður samdi við Solna

Miðherji Grindvíkinga í Dominos-deild karla í körfubolta, Sigurður Gunnar Þorsteinsson, hefur samið við sænska körfuboltaliðið Solna Vikings, sem leikur í úrvalsdeildinni þar í landi. Sigurður skrifaði undir eins árs samning við Solna í dag. Frá þessu er greint á Vísi.

Landsliðsmaðurinn Sigurður gekk til liðs við Grindvíkinga frá Keflavík fyrir tveimur árum en hann er fæddur og uppalinn á Ísafirði. Áður hefur Njarðvíkingurinn Logi Gunnarsson leikið með liðinu.

„Þetta er það sem flestir vilja, að fara eitthvert annað og sjá hvort maður getur eitthvað. Ég hafði komandi landsliðsár líka í huga. Mig langaði að taka næsta skref og það hjálpar mér að undirbúa mig fyrir Evrópumótið á næsta ári,“ sagði Sigurður í samtali við Vísi.