Sigurður aftur til Grindavíkur

Sigurður Þorsteinsson snýr aftur í raðir Grindvíkinga eftir  þriggja ára fjarveru, þetta kemur fram í fréttatilkynningu frá Körfuknattleiksdeild Grindavíkur.

Þorleifur Ólafsson hefur lagt skóna á hilluna en mun vera aðstoðarþjálfari Jóhanns í vetur og Ólafur Ólafsson endurnýjaði sinn samning við liðið þannig að bræðurnir munu halda áfram að þjálfa og spila með Grindavík í sumar.
Þorsteinn Finnbogason, Jens Óskarsson og Ómar Sævarsson endurnýjuðu einnig samninga sína.

Hér fyrir neðan má lesa fréttatilkynningu Körfuknattsleiksdeildar Grindavíkur:

Körfuknattleiksdeild Grindavíkur er sönn ánægja að tilkynna um undirskrift við Sigurð nokkurn Þorsteinsson sem er þekkt stærð í íslenskum körfubolta. Siggi hefur leikið sem atvinnumaður í Evrópu undanfarin 3 ár við góðan orðstýr en taldi þetta góðan tímapunkt að snúa til baka í paradísina. Við bjóðum Sigga hjartanlega velkominn!
Í leiðinni endurnýjaði Ólafur Ólafsson sinn samning og bróðir hans, „the x-man“ Þorleifur Ólafsson er kynntur til sögunnar sem hægri hönd stóra bro, Jóhanns Ólafssonar.

Og eins og þetta sé ekki nóg, þá endurnýjuðu einnig samning sinn þeir Þorsteinn Finnbogason, Jens Óskarsson og Ómar Sævarsson sem mun þá klárlega taka við sem „gamli karlinn“ í liðinu en enginn kom til greina með þann titil á síðasta tímabili annar en Lalli! Eins er ljóst að hinn bráðefnilegi Ingvi Þór Guðmundsson mun leika með liðinu á næsta tímabili.

Með þessu teljum við okkur hafa gert liðið vel í stakk búið til að taka þátt í baráttunni í Dominos deildinni í vetur!

Körfuboltakveðja,
Stjórn kkd. Umfg
„Við trúum“