Sigur í Árbænum

Grindvíkingar fóru sigurför í Árbæinn í gær. Fyrsta mark leiksins leit dagsins ljós strax á fyrstu mínútu og í leikhléi var staðan 1-0 fyrir Fylki. En Grindvíkingar mættu fílefldir til leiks í seinni hálfleik og skoruðu strax í upphafi.
Theódór Óskarsson skoraði fyrir Fylki í fyrri hálfleik en Ólafur Örn Bjarnason jafnaði metin með marki úr vítaspyrnu í byrjun seinni hálfleiks. Sinisa Kekic bætti síðan öðru marki við á 80. mínútu. Útlitið var ekki bjart fyrir Grindvíkingana þegar Ólafur Stígsson skoraði mark á 90. mínútu. Ólafur Örn var maður leiksins en tveim mínútum eftir jöfnunarmark Fylkis fengu Grindvíkingar aðra vítaspyrnu sem rataði rétta leið og í leikslok var staðan 2-3 fyrir Grindvíkinga. Liðið er nú í 5. sæti Íslandsmótsins með 21 stig en næsti leikur liðsins er við toppliðið, ÍA 8. september í Grindavík.