Sigmundur dæmir í Noregi
Sigmundur Már Herbertsson, körfuknattleiksdómari, hefur fengið tilnefningu frá FIBA en hann mun næsta laugardag dæma leik Noregs og Bosníu Hersegóvínu í úrslitakeppni B deildar í Evrópukeppni kvenna.
Þetta er fyrri leikur liðanna en seinni leikurinn verður leikinn í Bosníu Hersegóvínu 26. september. Sigurvegarinn úr viðureignunum tveimur vinnur sér sæti í A deild að ári ásamt sigurvegaranum úr viðureign Breta og Hollendinga. Íslenska liðið komst ekki í úrslitakeppnina í ár.
Meðdómari Sigmundar í leiknum er Johann Jeanneau frá Frakklandi og eftirlitsmaður er Jesper Brixen frá Danmörku.
