Scott Ramsey hetja Grindvíkinga

Grindvíkingar fögnuðu í kvöld fyrsta heimasigri sumarsins í Landsbankadeild karla þegar þeir lögðu KR að velli, 2-1. Þetta er raunar fyrsti heimasigur liðsins í efstu deild í tæp tvö ár, eða síðan þeir sigruðu Breiðablik í ágúst 2006.

 

Vesturbæingar byrjuðu leikinn mun betur en heimamenn og stjórnuðu leiknum lengst af. Nýr leikmaður Grinvíkinga, Gabonbúinn Gilles Ondo, fékk loks að leika með liðinu og var beittastur í sínu liði í upphafi leiks.

 

Gunnar Örn Jónsson skoraði fyrsta mark leiksins á 31. mínútu þegar hann skallaði knöttinn inn af markteigslínu eftir góða fyrirgjöf Guðmundar Reynis Gunnarssonar.

 

Gunnar var svo aftur á ferðinni á 43. mínútu, en þá hinum megin á vellinum, þar sem hann þrumaði knettinum í eigið mark eftir fyrirgjöf frá Andra Steini Birgissyni, óverjandi fyrir Stefán Loga Magnússon í KR-markinu. Rétt fyrir það hafði KR legið þungt á Grindvíkingum og lá mark þeirra í loftinu.

 

Þannig stóðu leikar í hálfleik, en skoski töframaðurinn Scott Ramsey kúventi leiknum einn og óstuddur í upphafi seinni hálfleiks. Á 50. mínútu fengu Grindvíkingar aukaspyrnu á um 30m færi sem Ramsey skaut úr og setti framhjá Stefáni Loga. Knötturinn hafði mögulega viðkomu í varnarveggnum en skotið

var glæsilegt og hnitmiðað.

 

Þetta mark gjörbreytti leiknum og koðnaði leikur gestanna niður í framhaldinu líkt og söngur Miðjunnar, stuðningsmanna KR.

 

Ramsey fékk annað færi skömmu síðar þegar Ondo stakk boltanum niður á hann hægra megin í teignum, en skot hans var misheppnað og Stefán Logi varði auðveldlega.

 

Eftir það sóttu KR-ingar en Grindvíkingar vörðust fimlega og beittu skyndisóknum án þess þó að hvorugt liðið næði að skapa sér fleiri afgerandi færi.

 

Milan Stefán Jankovic, þjálfari Grindvíkinga, var að sjálfsögðu í gleðivímu í leikslok þegar Víkurfréttir náðu tali af honum.

 

„Þetta var frábært! Við vorum kannski ekki að spila fallegasta fótboltann en baráttan var til staðar og það var það sem dugði í dag.“

 

Hann gat ekki neitað því að heppni hafði nokkuð að gera með sigurinn. „Já, við vorum sérstaklega heppnir í fyrri hálfleik og þeir voru miklu betri en við þá, en það var kannski kominn tími á smá heppni hjá okkur í sumar. Það er alltaf gott að vinna stórlið eins og KR og það gefur okkur vonandi sjálfstraust til að vinna fleiri leiki.“

 

KR-ingar geta kvittað fyrir þetta tap því liðin mætast að nýju á fimmtudag, þá í VISA-bikarnum í Frostaskjóli. Næsti deildarleikur Grindvíkinga verður á sunnudaginn þegar Íslandsmeistarar Vals koma í heimsókn.

 

Grindavík hefur með þessum sigri styrkt stöðu sína í deildinni þar sem þeir eru nú í 8. sæti, tíu stigum frá fallsæti og mun nær liðunum sem eru að berjast um og yfir miðja deild.