Rýkur úr Reynismönnum

Reynir Sandgerði vermir nú topp 2. deildar karla í knattspyrnu eftir 3-1 sigur á Sindra frá Hornafirði um helgina. Leikurinn fór fram á Hornafirði en nú hafa Sandgerðingar gert sex mörk í tveimur leikjum og eru sjóðandi heitir.

Eftir að hafa misst einbeitninguna í VISA bikarkeppninni og tapað á heimavelli gegn utandeildarliði Drangs hysjuðu Sandgerðingar heldur betur upp um sig og rúlluðu yfir Sindramenn 3-1.

Fyrsta mark leiksins var sjálfsmark Sindra og kom það á 21. mínútu leiksins en heimamenn jöfnuðu eftir vítaspyrnu á 38. mínútu og því var jafnt í hálfleik.

Hafsteinn Friðriksson kom Sandgerðingum í 2-1 á 60. mínútu og nafni hans Rúnarsson innsiglaði sigurinn á 72. mínútu og breytti stöðunni í 3-1.

Sandgerðingar eru nú á toppi 2. deildar og þeir hafa greinilega jafnaði sig á kjaftshögginu, eins og Gunnar Oddsson þjálfari, orðaði það um leikin í VISA bikarnum.

Staðan í deildinni

VF-mynd/ HBB: Brynjar Guðmundsson á fleygiferð gegn Aftureldingu í 1. umferð 2. deildar.