Reynismönnum skellt harkalega í Lengjubikarnum í gær

Reynismenn fengu að finna til tevatnsins þegar liðið mætti liði Aftureldingar í Mosfellsbæ í gærkvöldi og biðu þar stóran ósigur 8-2.

Afturelding, sem spilar í 2. deildinni í sumar, voru ekkert að tvínóna við hlutina og voru búnir að skora 3 mörk á fyrstu 10 mínútum leiksins gegn engu og létu kné fylgja kviði og höfðu bætt við þremur í viðbót áður en flautað var til hálfleiks. Jóhann Magni Jóhannsson lagaði stöðuna eilítið á síðustu mínútu fyrri hálfleiks og var staðan því 6-1 þegar liðin gengu til búningsherbergja.

Síðari hálfleikur var ögn rólegri en Afturelding bætti þar við tveimur mörkum til viðbótar áður en Pétur Jaidee minnkaði muninn í 8-2 áður en leikurinn var allur.

Reynismönnum hefur ekki gengið vel í keppninni og sitja á botni riðilsins með 1 stig eftir 3 leiki, eins og nágrannar þeirra í Víði Garði.

Næsti leikur Reynismanna er á laugardaginn þegar liðið mætir liði Tindastóls á Leiknisvelli í Breiðholtinu.