Reynir og Þróttur töpuðu sínum leikjum en Víðir gerði jafntefli
Bæði lið Reynis Sandgerði og Þróttar Vogum töpuðu sínum leikjum þegar keppni hófst í annarri deild karla í knattspyrnu um helgina. Víðismenn gerðu hins vegar jafntefli við Árbæ í fyrstu umferð þriðju deildar.
Reynir - Ægir 0:3
Nýliðar Reynis tóku á móti nýliðum Ægis í fyrstu umferð annarrar deildar karla í knattspyrnu um helgina. Reynismenn unnu þriðju deild á síðasta ári en Ægir féll úr Lengjudeildinni. Eftir markalausan fyrri hálfleik komust gestirnir yfir (53’) og skömmu síðar fékk Kerston George að líta rauða spjaldið (58’) og Reynismenn því manni færri.
Ægismenn bættu öðru marki sínu við á 66. mínútu og í uppbótartíma fékk Benedikt Jónsson, liðsstjóri Reynis, að sjá rautt (90’+2). Ægir innsiglaði sigur sinn með þriðja markinu skömmu áður en dómari leiksins blés til leiksloka (90’+8).
KFA - Þróttur 2:0
Þróttarar héldu til Reyðarfjarðar á laugardaginn þar sem þeir mættu KFA í annarri deild karla.
Heimamenn komust yfir á 32. mínútu, 1:0 í hálfleik og staðan hélst þannig þar til í uppbótartíma þegar KFA gulltryggði sigurinn með öðru marki sínu (90’+5).
Árbær - Víðir 2:2
Víðismenn enduðu í fjórða sæti þriðju deildar á síðasta tímabili en Árbæingar einu sæti ofar. Það mátti því fyrirfram búast við jöfnum leik.
Víðismenn fengu draumabyrjun og komust yfir með marki Alex Þórs Reynissonar á fjórðu mínútu.
Árbæingar jöfnuðu leikinn á 18. mínútu en David Toro Jimenez kom Víði aftur í forystu skömmu fyrir hálfleik (43’).
Heimamenn skoruðu svo eina mark seinni hálfleiks (59’) og jafntefli því niðurstaðan.
