Reynir – Fjarðarbyggð á morgun kl. 14 Frítt á völlinn!

Reynismenn leika fyrri leikinn gegn Fjarðarbyggð í undanúrslitum 3. deildar á morgun kl. 14:00. Seinni leikur liðanna fer fram á Eskifjarðarvelli þriðjudaginn 31. ágúst og hefst kl. 17:30. Það lið sem hefur betri samanlagða markatölu úr leikjunum tveimur vinnur sér sæti í 2. deild að ári. Séu markatalan jöfn fer það lið áfram sem skorar fleiri mörk á útivelli. Það eru Huginn frá Seyðisfirði og Skallagrímur frá Borgarnesi sem eigast við í hinni viðureign undanúrslitanna. Sigurliðin leika síðan til úrslita 5. september um fyrsta sæti 3. deildarinnar, en tapliðin leika um 3. sætið sama dag.

Reynismenn hafa síðan 1999 án árangurs reynt að koma sér upp úr 3. deildinni. Það var árið 1995 sem Reynir fór síðast upp úr neðstu deild og þá einmitt í leikjum við lið frá Austfjörðum, í það skiptið Sindra frá Hornafirði. Þá vó stuðningur áhorfenda þungt og gaf leikmönnum þann aukakraft sem þurfti til að sigra. Nú þarf stuðningurinn að vera sá sami og helst meiri. Allir sem vettlingi geta valdið verða því mæta á völlinn á laugardaginn og láta vel í sér heyra. Stuðningur á útivellinum er ekki síður mikilvægur og því eru þeir Reynismenn sem eiga möguleika á því að mæta á völlinn fyrir austan hvattir til að gera það. Ekki á að skemma að Sandgerðisdagar eru haldnir hátíðlegir nú um helgina og leikurinn er gott innlegg í þá hátíð.
ÓÞÓ