Rallýbílar á ferð og flugi um Suðurnesin

Aðalskoðunar rallý Akstursíþróttafélags Suðurnesja lauk um helgina eftir æsispennandi keppni. Suðurnesjamennirnir og núverandi Íslandsmeistarar, þeir Henning Ólafsson og Árni Gunnlaugsson, höfnuðu í þriðja sæti í keppninni að þessu sinni. Annað Suðurnesjatvíeiki, þeir Sigurður Arnar Pálsson og Brynjar Guðmundsson höfnuðu í 7. sæti. Bæði þessi lið aka á Subaru Impreza.

Farið var víða um Suðurnesin í keppninni en ökumenn fóru af stað um Nikkelsvæðið en svo var ekið að venju um hina sívinsælu leið um höfnina í Keflavík en þar voru fjölmargir áhorfendur mættir til þess að fylgjast með. Meðal annarra ökuleiða á Suðurnesjum sem var farið um helgina voru Djúpavatn, Stapafell, Helguvík og Stapi. Þess má geta að Sjónvarp Víkurfrétta var á staðnum og mun sýna frá keppninni í þætti sínum á ÍNN á fimmtudag klukkan: 21:30.

Lokastöðu og tíma frá rallýinu má svo finna hér.