Örn Arnarson valinn Íþróttamaður Reykjanesbæjar 2003

Örn Arnarson, sundkappi úr ÍRB var valinn Íþróttamaður Reykjanesbæjar fyrir árið 2003 í athöfn sem haldin var í íþróttahúsinu í Njarðvík fyrr í dag. Gunnar Einarsson, körfuknattleiksmaður úr Keflavík, var í öðru sæti og Jóhann Kristjánsson, borðtenniskappi úr íþróttafélaginu Nes, hafnaði í því þriðja.

Örn er sannarlega vel að þessari viðurkenningu kominn, en þetta er annað árið í röð sem hann hlýtur nafnbótina. árangur hans á árinu var frábær sem endranær og vann hann til 9 meistaratitla og vann til silfurverðlauna á Evrópumótinu í 25m laug sem fór fram í desember. Þá setti Örn 11 Íslandsmet og 2 Norðurlandamet sem sýna svo ekki verður um villst að hann er í stöðugri sókn sem sundmaður og er alltaf að bæta sig.

Í samtali við Víkurfréttir sagði Örn að þessi heiður hafi komið honum nokkuð á óvart. En finnst honum flutningurinn frá SH til Íþróttabandalags Reykjanesbæjar hafa gert ferli hans gott? „Já, tvímælalaust. Ég þurfti annað umhverfi og aðra sýn á íþróttina og það hef ég svo sannarlega fengið hér.“

Á næsta ári standa Ólympíuleikarnir í Aþenu í ágúst upp úr og leggur Örn höfuðáherslu á að ná árangri þar, en Evrópumeistaramótið í 50m laug er líka á dagskrá auk móta innanlands.

Við athöfnina í dag hlutu allir Íslandsmeistarar Reykjanesbæjar viðurkenningu fyrir afrek sín, en þeir voru samtals 175 talsins að þessu sinni. Þá voru þeir íþróttamenn sem skarað hafa fram úr á í hverri grein heiðraðir fyrir árangur sinn á árinu sem er að líða.

Badminton	Þorgerður Jóhannsdóttir	Keflavík
Fimleikar	Eva Berglind Magnúsdóttir	Keflavík
Golf	Örn Ævar Hjartarson	GS
Hestaíþróttir	Sveinbjörn Bragason	Máni
Hnefaleikar	Skúli Vilbergsson	HFR
Íþróttamaður fatlaðra	Jóhannes Rúnar Kristjánsson	Nes
Taekwondo	Normandy Del Rosario	Keflavík
Knattspyrna	Þórarinn Kristjánsson	Keflavík
Körfuknattleikur	Gunnar Einarsson	Keflavík
Lyftingar	Freyr Bragason	UMFN
Sund	Örn Arnarson	Keflavík
Skotfimi	Ásgeir Svan Vagnsson	Keflavík
Siglingar	Svava Magdalena Böðvarsdóttir	Knörr