Ólafur hættur sem þjálfari Grindvíkinga

Fram kemur á vef Grindavíkur að Ólafur Örn Bjarnason hafi ákveðið að stíga til hliðar sem þjálfari Grindavíkur í knattspyrnu en hann mun samt sem áður leika áfram með liðinu.

Ólafur tók við þjálfun Grindavíkurliðsins fyrir tímabilið og samhliða þjálfuninni lék hann með liðinu. Fram kemur á vef Grindvíkinga að Ólafur vilji einbeita sér að því að spila með liðinu á næstu leiktíð en hefur fullan hug á því að halda áfram þjálfun í framtíðinni.

Stjórn knattspyrnudeildar Grindavíkur virðir ákvörðun Ólafs Arnar og fagnar því að hann vilji halda áfram sem leikmaður félagsins. Leit að nýjum þjálfara liðsins er þegar hafin.