Öflugt starf íþróttafélagsins NES
Íþróttafélag fatlaðra, NES, stóð fyrir Norðurlandamóti í boccia í Reykjaneshöllinni dagana 5.-7. maí. Mótið tókst afar vel og að því loknu var þátttakendum boðið til lokahófs. Nú um helgina verður annað stórmót í Reykjaneshöllinni, á vegum fatlaðra, og eru bæjarbúar hvattir til að mæta og hvetja íþróttamennina okkar. Kjartan Már Kjartansson (B) tók fram á fundi bæjarstjórnar Reykjanesbæjar sl. þriðjudag, að mótið hefði verið NES til sóma en félagið hefur haldið þrjú stórmót í vetur á vegum Íþróttasambands fatlaðra. „Forysta íþróttahreyfingar fatlaðra hér suðurfrá er mjög öflug og hún á heiður skilinn fyrir frammistöðuna“, sagði Kjartan. Laugardaginn 20. maí verður haldinn knattspyrnuskóli og knattspyrnumót í Reykjaneshöllinni á vegum Íþróttasambands fatlaðra í samvinnu við Knattspyrnusamband Íslands og Íþróttafélagið NES. Dagskráin er í tengslum við Íslandsleika Special Olympics sem haldnir eru í Reykjavík. Má búast við að mótið verði hið glæsilegasta.
