Nýr golfkennari til GS

Nýr golfkennari hefur tekið til starfa hjá Golfklúbbi Suðurnesja. Hann heitir Paul Stoller og er 32 ára Englendingur. Paul kom til landsins í vikunni og er strax byrjaður að kenna byrjendum sem lengra komnum í æfingahúsi GS við Hafnargötu 2 í Keflavík. Paul gerðist PGA golfkennari árið 1992 og hefur kennt síðan bæði í heimalandi sínu og víðar annars staðar, s.s. i Svíþjóð, Tyrklandi, Malasíu, Austurríki, Slóveníu og Póllandi en breskir golfkennarar hafa verið mjög vinsælir víða um heim.
Paul hóf að leika golf aðeins tólf ára og stefndi á að verða atvinnumaður í golfi og gerði góða tilraun til þess en ákvað að snúa sér frekar að golfkennslu sem væri öruggari starfsvettvangur til framtíðar.

„Mér líst mjög vel á aðstæður hér hjá Golfklúbbi Suðurnesja. Ég hef ekki leikið Hólmsvöll en það sem ég hef séð líst mér vel á. Aðstæður til golfkennslu eru fínar í Leirunni og einnig í æfingahúsinu og ég vonast eftir góðu samstarfi við golfara á Suðurnesjum", sagði Paul.
Hægt er panta tíma hjá Paul beint í gsm: 898-0087 og hjá GS í síma 421-4103.